القائمة الرئيسية

الصفحات

اخر الاخبار[LastPost]

أعمال تحت التـــنــفيذ آخر المدة .

أولا لازم نعرف أن فى فرق بين أعمال تحت التنفيذ ومشروعات تحت التنفيذ أو الإنشاء

أعمال تحت التنفيذ ده لمشروعات عملاء مش ملك لينا وبيطلع منها ايراد ومصروف = قائمه دخل

مشروع تحت الإنشاء ده إنشاء أصل خاص بينا و بيدخل الأصول فى الميزانيه بعد كده

يبقى أعمال تحت التنفيذ :

هي عبارة عن مصروفات مشروع تم أقفالها بالحساب الختامي ( قائمه الدخل فى اخر العام ) و تم تحميلها عليه و لم تساهم بعد في توليد إيراد . هذه المصروفات يتم إثبات ايراد يقابلها وذلك طبقا لمبدأ المقابلة ( اى مقابله المصروف بالإيراد ) , هذه المصروفات قد تكون احد الاتى :

مواد تم صرفها بالفعل أو تم تحميلها علي الحساب الختامي و لم تدرج بعد بمستخلص الإيراد .

أجور تم صرفها بالفعل و لم تدرج بعد بمستخلص الإيراد .

أعمال (مصروفات) تم تنفيذها بالفعل ولم تدرج ضمن اى مستخلص ولم تحسب كايراد او تم إدراجها بمستخلص الإيراد كبنود إلا انه الاستشاري لم يعتمدها .

فرق نسبة صرف بين مستخلص مقاول الباطن (المصروف) و بين نسبة صرف هذا البند بمستخلص الإيراد ( الإيراد) .

مثال :- بفرض أن تم عمل مستخلص مقاول باطن بنسبة صرف 100 % إلا أن هذا البند تم اعتماده كبند إيراد في مستخلص الإيراد بنسبة صرف 80 % معني ذلك انه يوجد 20 % تم إثباتها كمصروف للمقاول الباطن و لا يوجد ما يقابلها إيرادات .

مصروفات تمويلية و الخاصة بعمولات خطابات الضمان فقد تكون هذه العمولة عن مدة سنة و هي مدة خطاب الضمان و لذلك يجب تحديد قيمة من هذه العمولة (مصروف مقدم ) .

مصروفات تجهيز الموقع في بداية المشروع والسنه خلصت وانا لسه مبداتش اوى فى الشغل , يجب تحديد قيمة من هذه المصروفات كأعمال تحت التنفيذ ( برضو زى مصروف مقدم ) .

أي مصروفات أخرى تكون محملة علي الحساب الختامي و لم تساهم كلها في تحقيق إيراد خلال الفترة .

من الاخر اى مصروفات او اجور عماله او مواد او تنفيذ اعمال تم تنفيذها خلال العام الحالى ولم تثبت كايراد خال نفس الفتره ... كانى اشتغلت وجبت مواد وعامله ودفعت اجور و مصاريف لمقاوله فى عام 2000 حتى 31/12 و معملتش مستخلص يثبت الايراد من الاعمال دى ...

طبقا لمبداء المقابله (الايراد بالمصروف) لابد وان اثبت ايراد زى ما ثبتها مصروف .. صح ولا ايه ؟؟

طبعا صح يبقى اعمل ايه بقا وانا عمال اصرف طول السنه ولسه مقدمتش اى مستخلص ولم اثبت ايراد للعمليه دى خالص ؟؟؟

وبرضو طبقا لمبداء الاستحقاق (كل سنه بما تستحق من مصروف وايراد) لابد وان اثبت ايراد زى ما ثبتها مصروف .. صح ولا ايه ؟؟

تعالى نشوف كده الحلول الموجوده عندى وبلله عليك ركز شويه لانه كلام فى منتهى الاهميه

هناك عده طرق للحكايه دى وتعالى نشوف هنعملها ازاى :

الطريقه الاولى : نسبه الاتمام او الانجاز .

قال يا برنس نسبه الاتمام او الانجاز دى ... انا بشوف انا نفذت اد ايه من المصروفات ودى تعتبر كام من اجمالى المصروف ( لكل بند على حده ) وبقيس عليها الايرادات .. طبعا انت مش فاهم .. اقولك تانى ,,

مثلا انا شغال خلال عام 2005 فى مشروع و صرفت 115 الف جنيه كالاتى :

اعمال خرسانه ( بتكلفه 50 الف ) و كهرباء ( بتكلفه 30 الف ) و سيراميك ( بتكلفه 20 الف ) ..

عاوز اعرف اثبت ايراد كام لسنه 2005 دى فى 31/12 ؟؟!!

حلو الكلام ؟؟!! باجى اشوف البنود دى انا اخدتها اصلا بكام فى المناقصه ك سعر بيع للعميل و المفروض انى هتكلف فى البند كله بكام ؟؟؟؟؟ مثلا مثلا بند الخرسانه هيكلفنى فعلى فى المشروع كله 200 الف ,, وانا حاطه فى المناقصه ( المقايسه التثمينيه او عرض السعر بتاعى ) بسعر بيع للعملي 250 الف .. يعنى انا المفروض انى هتكلف 200 وابيعه ب 250 الف واكسب منه 50 الف ,, تمام لحد كده ؟؟؟ طيب نسبه التكاليف لحد 31/12/2005 كام من اجمالى تكلفه البند كله ؟؟

قالى نسبه البند اللى اتصرف لحد اخر السنه ولسه متعملش بيه مستخلص كانت 50 الف يعنى ربع البند ده اى ( 50 ÷ 200 = 25% ) .. يعنى انا صرفت ربع البند == يبقى استحق عليه ربع الايراد ..

الايراد كان كام ؟؟ 250 الف يبقى ربعه ( 250 × 25% = 62500 ) .. بس كده

يعنى نسبه وتناسب .. كانى مثلا المفروض انى ابيع 4 كوسات علشان احصل على 8 جنيه ..

انا بعت 2 بس يبقى المفروض انى احصل على 4 جنيه بس ... حلوه دى ؟؟ تعالى نشوف ,,

تعالى نشوف بتتحسب ازاى ؟؟ كده

البند سعر المناقصه (ايراد) تكلفه البند ككل سعر التكلفه (مصروف) نسبه الانجاز

(مصروف ÷ ايراد) قيمة الايراد المثبت

( الايراد × نسبة الانجاز)

اعمال خرسانه 250,000 200000 50000 50/200=25% 250×25% =62500

اعمال كهرباء 110,000 90000 30000 30/90=30% 110×30%=33000

سيراميك 140,000 100000 35000 32/100=32% 140×32%=44800

الاجمالى 500000 390000 115000 0 140300

هوباااااااااااااا انا فعلا باخد اجمالى كل بند و احسب نسبه المصروف منه واضربها فى الايراد .. بس كده

تعالى شوف المعالجه المحاسبيه و القيود لمبلغ الايراد ( 140300 ) بتتعمل ازاى ؟؟

انى اعليها على حساب العميل علطول ك ايراد علشان اثبتها عليه و احملها ايراد فى نفس الوقت علشان مبداء الاستحقاق ( احمل كل سنه بما تستحق من مصروف وايراد ... يعنى زى ما حملتها مصروف 115 الف احملها ب ايراد 140300 ج- عداله ) .. و ده من خلال قيود التسويات الجرديه اللى بعملها كالاتى :

140300 من ح / العملاء – مشروع ×× ( او بعمل ح / ايرادات مستحقه لو مش هعليه على ح /العميل )

140300 الى ح / ايراد العمليات – مشروع ××

السنه الجايه 2006 بكمل الاعمال و اعمل حاجات تانى واصرف حاجات تانى و عملت حصر للاعمال وقدمت مستخلص ب 500 الف هعمل قيد بالفرق ( 500-140300= 359700 )

359700 من ح / العملاء ××

359700 الى ح / الايراد – مشروع ××

يعنى انا اقريت بالربح والمصروف وحملت كل سنه على حدى بالقيمه العادله الحقيقيه زى ما الكتاب بيقول

كده فهمت النظريه ؟؟؟؟ تعالى بقا نقول الكلام المتين الاصح من اللى فوق ده لانى كنت عاوز افهمك بس علشن كده قلت عميل انما ده مش كويس والصح المتين انى اقول اعمال تحت التنقيذ وتعالى نعالج

فى 2005 لما احب اعمل قيد استحقاق هقول

140300 من ح/ اعمال تحت التنفيذ ( مشروع ×× )

140300 الى ح / ايراد مشروع ××

كده انا عليت فى الميزانيه حساب مدين ( اعمل تحت التنفيذ ) بدلا من العميل لانى مش هدخلها حساب على العميل دلوقتى .. و فى نفس الوقت تطبيقا لمبداء المقابله سجلت ايراد الفتره 2005 ,,,,

فى 2006 لما اعمل مستخلص ب 500 الف هعمل قيد

500000 من ح / العملاء ( عميل مشروع ×× )

الى مذكورين

140300 ح / اعمال تحت التنفيذ مشروع ××××

359700 الى ح / الايراد – مشروع ××

كده انا فعلا عملت مستخلص ب 500 الف و قدمته للعميل و عليته على حسابه و منتظر التحصيل فعلا .. كمان حسب ارباح 2006 ب 359700 جنيه بس وليس 500 لان 140300 دول يخص ايراد 2005 ,, كمان انا قفلت حساب اعمال تحت التنفيذ اللى كنت فاتحه وبقى رصيده صفر …

كده ان اتمام وفاهم القصه اولها واخرها

خلى بالك : فى نظريه بتقول انى ممكن اقفل المصروفات اللى صرفتها على الموقع( تكاليف العمليه ) طول الفتره فى ح / مصروفات ايراديه مقدمه او اعامل تحت التنفيذ او او ايراد مؤجل و غيره .. بس ده يا برنس هيخلينى يبين انى معنديش مصروفات خلال 2005 وده طبعا غلط لان عندى 115 الف مصروف .... و ده لعب غلط وان امعترض على الكلام ده بس ممكن افكر انى اوافق على توسيط حسابى ,,

كمان هاجى السنه الجايه 2006 اعكس القيد و احمل 2006 ب كل المصاريف لانى هحملها بكل الايراد .

يعنى فى مثالنا السابق هاجى فى 2006 واعمل مستخلص ب 500الف اللى هو مكلفنى 420 الف مثلا و بكده انا بتعرف بالايراد والمصروف فى 2006 وده مش هيؤثر على الربح ...

بس ده يتعارض بمبداء الاعتراف ( انى بتعرف بمصروف و ايراد عام فى عام اخر ) و المقابله ( مصروفات فعليه لم تسجل ولم تقابلها ايراد ) و الفتره المحاسبيه ( دخلت سنتين فى بعض ) والاستحقاق ( انى محملتش كل فتره بما تستحقه )

كمان فى ناس مش بتعترف بالايراد الا فى اخر العمليه .. فلو عمليه استمرت 3 سنين بياجل الاعتراف الى نهايه السنه التالته بس وقتها هيلبس فى ضرايب كتيرررررر بدل ما يدفع كل سنه شويه هيلاقى انه بيدفع اكتر واكتر وهيلبس فى مبلغ كبيرررررر,., ( زى شركات الاستثمار العقارى )

قيد لما بقفل التكاليف السنادى و افتحها السنه الجايه ..

اقفال عام 2005 افتتاح عام 2006

115 من ح / اعمال تحت التنفييذ – مشروع × 115 من ح / مصروفات العمليات ××

115 الى ح / مصروفات العمليات ×× 115 الى ح / اعمال تحت التنفييذ – مشروع ×

و يكمل باقى المصروفات وبفرض انها فى 2006 طلعت 305 الف و كده الاجملى المصروفات 420 الف والمستخلص طلع ب 500 الف بيعملها مره واحده بس طبعا هو حر

500000 من / العملاء ×××

500000 الى ح / ايراد العمليات ××

الطريقه دى انا مش معتف بيها تماما’’’’,,,.. فى شركات المقاولات ولكنها بتنفع فى الاستثمار العقارى لتاجيل الصريبه لحين الاعترف بالايراد …

راجع الاستثمار العقارى من كتاب محاسبه المقاولات ,,,

115

الطريقه الثانية : الاعمال المنجزه الفعليه .

هى الاعمال التى انجزت فى العمل فعلا وده بيكون عن طريق المهندس اللى عندى مع مهندس الاستشارى وهما بيحددو نسبه الاعمال المنجزه الى نسبه الاعمال الكليه ( قريبه جدا من الطريقه السابقه ) يعنى فى المثال السابق لو اتضح ان نسبه بند الخرسانه مثلا 20 % يبقى هعترف ب ايراد 50 الف .. ولو كانت نسبه الاعمال المنجزه للبند 100 % يبقى هعترف بايراد البند كاملا ( كما فى المناقصه ) .

و عمل قيود زى الطريقه الاولى تماما بدون اختلاف ..

لازم تعرف انى بعمل الحكايه دى ولازم الاستشارى يعتمد البنود دى كانى انجزت خلال عام 2005 نسبه 20 % من قيمه الاعمال الخرسانيه و نسبه 28 &من الكهرباء ونسبه 26 % من السيراميك ..

وده اللى انا بقيس عليه الكلام ده و اعمل بيها قيود داخليه عندى و اثبت الايراد بتاعها ولا اطالب بيها المالك فى حينها بل هتدخل فى المستخلص الجاى ابو 500 الف . يعنى ده شغل داخلى عندى انا .

نفس القيود والمعاجله المحاسبيه

الطريقه دى كويسه جدا طبعا زى الاولى تقريبا و بتستعمل كثيرا اوى اوى اوى

فى 2005 لما احب اعمل قيد استحقاق هقول

140300 من ح/ اعمال تحت التنفيذ ( مشروع ×× )

140300 الى ح / ايراد مشروع ××

كده انا عليت فى الميزانيه حساب مدين ( اعمل تحت التنفيذ ) بدلا من العميل لانى مش هدخلها حساب على العميل دلوقتى .. و فى نفس الوقت تطبيقا لمبداء المقابله سجلت ايراد الفتره 2005 ,,,,

فى 2006 لما اعمل مستخلص ب 500 الف هعمل قيد

500000 من ح / العملاء ( عميل مشروع ×× )

الى مذكورين

140300 ح / اعمال تحت التنفيذ مشروع ××××

359700 الى ح / الايراد – مشروع ××

كده انا فعلا عملت مستخلص ب 500 الف و قدمته للعميل و عليته على حسابه و منتظر التحصيل فعلا .. كمان حسب ارباح 2006 ب 359700 جنيه بس وليس 500 لان 140300 دول يخص ايراد 2005 ,, كمان انا قفلت حساب اعمال تحت التنفيذ اللى كنت فاتحه وبقى رصيده صفر ...

كمل معانا وشوف كده

الطريقه الثالثه : مستخلص اعمال داخلى .

الطريقه دى انا بخلى الاداره الهندسيه تساعد فى الحكايه دى و هى نفس الطريقه الاولى بالظبط بس بدون ما اعتمد على الاستشارى لانه ممكن يرفض بعض البنود ..

يعنى بعمل مستخلص وهمى داخلى الشركه علشان اثبت الايراد المقايل للمصروف بتاع الفتره وكانى هقدمه للمالك بالظبط بس مش بقدمه و لا بيعتمد من بره بس بيعتمد من المدير المالى ومدير المشروعات و بعمل نفس الطريقه والقيود بتاع الطريقه الاولى تماما علشان اقفل 2005 .

بعلى على حساب العملاء واثبت الايراد

من ح / اعمال تحت التنفيذ ××

الى ح / الايراد مشروع ××××

ولما بعمل مستخلص فى 2006 بتكون نفس المعالجه ونفس القيود وكله كله كله ..,,

الطريقه الرابعه : ح / تنفيذ العقود والمقاولات .

الطريقه دى انقرضت خلاص وتقريبا محدش بيستعملها بس برضوكانت موجوده فى يوما ما ,,

الطريقه دى بتعامل المصروفات التى لم يثبت لها ايراد كانها مخزون بضائع و بتحمل المشورع بيه . وده من شانه انه يزود الايراد بقدر المصروف ,,,, و السنه الجايه بنقفله وعليك خير وخدلك فكره عنه ,,

القيد- إثبات أعمال تحت التنفيذ آخر المدة :

من حـ/أعمال تحت التنفيذ آخر المدة

إلى حـ/تنفيذ العقود و المقاولات

- أعمال تحت التنفيذ آخر المدة ستكون أعمال تحت التنفيذ أول المدة خلال العام التالي و سيتم أقفالها بالحساب الختامي في العام التالي ,,, وخلى بالك اننا بنعمل الحوار ده علشان منحملش المشروعات او الايراد يعنى باى مصاريف زياده عليه يعنى زى معالجه م . مقدم تقريبا ( نحمل السنه بما يخصها من مصروفات فقط ) .

عاوز اؤكد انى بعاملها كده علشان مقفلهاش ( لانه غلط اى انى معترفش باى مصروف زى ما قلنا سابقا ) و فى نفس الوقت بعلى مخزون اخر المده اللى من شانه انه يعلى الايراد .. يعنى كانى بالظبط اعترفت بالايراد بس بنفس قيمه المصروف .. ازاى ؟؟

يعنى انا صرفت فعلى 50 الف و المفروض ان المصروف ده بيولد لى ايراد 70 الف ( ربح 20 الف ) .. بلاقى انى بعترف بالايراد 50 الف فقط وليس ال 70 الف ,,,, علشان كده بطلنا نستعملها

ملحوظه هامه جدااااااا :

يتناسب مخزون اخر المده مع الايراد تناسب طردى – يعنى لما المخزون اخر المده بيزيد .. بيزيد معاه الايراد ,,,,:: ولما بيقل ... بيقل معاه الايراد ,

- نرجع نقول احنا بنعمل القصه دى يا اخونا علشان لو فى اى مصاريف احنا عملناها على مشروع ولم نقدمها فى مستخلص او المستخلص لم يعتمد بعد او كده بنخفضها من المصاريف ( قائمه دخل ) وفى نفس الوقت بننزلها فى الميزانيه على انها اصل مدين عادى جداااا وغالبا بتنزل باسم مشروعات تحت التنفيذ علشان الناس اللى بتقرى القاوائم تعارف ان دى فلوس مشروعات لم تعتمد مثلا ,,,,

حـ/تنفيذ العقود و المقاولات ( زى أ . خ فى الشركات العاديه )

مصاريف العمليات إيرادات العمليات

اهلاكات أعمال تحت التنفيذ آخر المدة

أعمال تحت التنفيذ أول المدة

**** مجمل الربح (متمم )

*** رصيد *** رصيد

ملاحظــــات ؛

لاحظ أن مصاريف العمليات تشمل المواد المنصرفة فقط ,,

لاحظ برضو ان الحساب ده وسيط وبيطلع مجمل الربح لكل مشروع على حده ,,

خلى بالك اننا لا نستغنى بيه عن قائمه الدخل لكل مشروع برضو ودى هنشوفها تحت حالا ,,

برضو الحساب ده زى أ . خ بتاع الشركات العاديه يعنى بنقفل فيه المصروفات كلها والايرادات كلها وفى ناس مبتعملوش وبتقفل فى ح أ . خ عادى والمعاجتين صح يا اخونا ,,

قائمة استغلال العقود و المقاولات عن المدة من 1/1/2009 إلى 31/12/2009

( زى قائمه الدخل بالظبط )

جنيه جنيه جنيه بيـــــــــان

××× إيرادات العمليات

يخصم

××× - مصروفات العمليات

-الاهلاكات

××× وسائل نقل و انتقال

××× عدد و أدوات و قمط

××× آلات و معدات

××× أخشاب

××× أثاث و معدات مكاتب

××× اجمال مصروفات واهلاكات

××× مجمل الربح

يضاف

××× أعمال تحت التنفيذ آخر المدة

×××

يخصم

××× أعمال تحت التنفيذ أول المدة

×××

××× مجمل ربح العمليات

ملاحظــــات ؛ القائمه دى يا اخونا زى قائمه الدخل بالظبط بس دى بتتعمل لكل مشروع على حده علشان نعرف منها المشروع ده ايراداته ( مستخلصات الايراد ) كانت اد ايه ومصروفاته ( مصروفات العمليات والاهلاكات فقط) كانت كام وبنحط عليه اى اعمال تحت التنفيذ اخر ونخصم منه اول, وزى ما فى قائمه الدخل بنضيف ونخصم بضاعه اول واخر المده تقريبا , المهم بيطلع لنا مجمل ربح المشروع ده ,, وبعدها بنجمع الارباح دى اللى هيا الايرادات العمليات ونعمل بيها قائمه الدخل العاديه بتاع الشركه اللى بنخصم منها المصاريف الاداريه وبلابلابلا وانتو عارفين الباقى بقا ,, وبكده تبقى الحكايه انتهت وتوته توته فرغت الحدوته ,,,,,

توزيع المصروفات العموميه على المشروعات .

طبعا نشاط المقاولات زى ما عارفين بيستمر لعده سنوات .. بناخد المقاوله 2006 و ممكن تقعد 3 او 4 سنين ... بس انا بعمل ميزانيه وقائمه دخل واقفل اخر السنه .. والمشروع لسه شغال .. اعمل ايه ؟؟

عاوز اعرف ربح المشروع ده لوحده و ربح الشركه ككل ...

عادى جدااااااااااااااا , بوزع المصروفات العموميه على كل المشورعات اللى عندى بنسب توزيع ,,

طبعا هيقولى مين نسب توزيع دى ؟؟ اقولو يعنى كل مشروع بوزع عليه جزء او نصيبه من المصروفات العموميه وده بعده طرق هنقول منها شويه دلوقتى .... بس ااول تعالى نناقش كده المثال ده

فى 2006 كانت المصروفات العموميه 850 الف وعندى 4 مشاريع بيانتهم كالتالى :- ... اوزع ازاى ؟؟

( أ ) ( ب ) ( ج ) ( د ) الاجمالى

القيمه – جنيه 5000000 20000000 9000000 12000000 46000000

الزمن – سنه 2 4 3 3.5 0

ت البدايه 8/2006 5/2006 12/2003 1/2004 0

ت النهايه 1/2008 5/2010 12/2006 6/2007

الايرادات 0 1000000 5000000 1120000 7120000

مواد – جنيه 45000 950000 2650000 840000 4485000

اجور- جنيه 40000 350000 1050000 240000 1680000

تكاليف اخرى 15000 80000 240000 65000 400000

الاجمالى ت 100000 1380000 3940000 1145000 6565000

طيب تعالى كده نشوف ازاى هنوزع المصروفات العموميه اللى عندى على المشاريع دى ؟؟

طريقه التوزيع بقيمه المشروع ( نسبه المشروع ) : يعنى نسبة كل مشروع لباقى المشروعات

طريقه المواد المنصرفه يعنى برضو نسبه المواد للمشروع بالنسبه لاجمالى المواد للكل

طريقه الاجور المباشره – برضو اجور المشروع بالنسبه لاجمالى الاجور

طريقه اجمالى التكاليف – يعنى اجمالى تكاليف كل مشروع بالنسبه لكل المشروعات

طريقه اجمالى القيمه المضافه . يعنى المشروع اضاف قيمه ( ايراد ) اد ايه للشركه ؟؟

كفايه دول وتعالى نشوف بقا هنوزع ازاى ؟؟؟ واى الطرق افضل وليه ؟؟؟

احنا هناخد 3 طرق هنا وانت كمل الباقى بنفس الاسلوب ,,, الايراد والتكاليف ,,

( أ ) ( ب ) ( ج ) ( د ) الاجمالى

الايرادات 0 1000000 5000000 1120000 7120000

مواد – جنيه 45000 950000 2650000 840000 4485000

اجور- جنيه 40000 350000 1050000 240000 1680000

تكاليف اخرى 15000 80000 240000 65000 400000

الاجمالى ت 100000 1380000 3940000 1145000 6565000

نسبه الايراد 0 14% 70% 16% 100%

نسبة الاجور 2% 21% 63% 14% 100%

نسبه اجمالى ت 1.5% 21% 60% 17.5% 100%

تعالى بقا نوزع م عموميه دى ( 850 الف ) على المشروعات بال3 طرق دول ونشوف

( أ ) ( ب ) ( ج ) ( د ) الاجمالى

نسبه الايراد 0 119000 595000 136000 850000

نسبة الاجور 17000 178500 535500 119000 850000

نسبه اجمالى ت 12750 178500 510000 148750 850000

ملاحظات على الطرق والحل هــــــــــــامه جـدا :

طبعا عارفين انى بطلع اى نسبه بقسمه البند على الاجمالى لنفس البد .. بمعنى ,,, مثلا :

نسبه ايراد مشروع ( أ ) = صفر ÷ 7120000 = صفر

نسبه ايراد مشروع (ب ) = 1000000 ÷ 7120000 = 14%

نسبه اجور مشروع ( د ) = 240000 ÷ 1680000 = 14%

نسبه اجور مشروع ( ج ) = 1050000 ÷ 1680000 = 63%

نسبه اجمالى ت مشروع ( ب ) = 1380000 ÷ 6565000 = 60%

نسبه اجمالى ت مشروع ( د ) = 1145000 ÷ 6565000 = 17.5%

اول حاجه بنظره صغيره كده هنعرف ان كل مشروع ابتدى امتى و نظامه ايه و شغله اد ايه . يعنى المشروع الاول لسه واخدينه و مشتغلناش فيه تقريبا يعنى و مالوش ايراد اصلا ..

المشروع ( ب ) الاكبر قيمه بينما المشروع ( ج ) هو الاكتر مصروف وايراد .. يعنى نفهم من كده ان اكتر التركيز كان على المشروع ( ج ) وده لان تاريخ انتهاءه كان فى اخر العام الحالى يبقى احنا عاوزين نقفل المشروع ده علشان نخلص ومناخدش غرامات وخلافه ..

المشروع ب رسى علينا السنادى وده مشروع كبير علشان كده دخلنا فيه جامد من الاول علشان الوقت ميسرقناش ونلبس فى مشاكل

طبعا لاننا مشغولين اوى بالمشروع اللى هنسلمه ( ج ) و المشورع الكبير المهم ( ب ) نفضنا مبدئيا لمشروع ( أ ) لانه صغير ومفيش مشكل و عادى جدااااا ,,..,,

المشروع ( د ) شغالين فيه بس صارف و جايب ايراد بمتوسط15 % والمفروض انه فاضل ليه 6 شهور بس و المفروض ان دى تالت سنه انتهت يعنى المفروض انى بقفل فيه ... يبق فى حل من الاتى :

يا اما انا اشتغلت فيه كتير السنتين اللى فاتو ( لان مكنش عندى مشاريع غير ( ب ) بس و كده يبقى انا شغال كويس نظريا و هيتسلم فى موعده ,,

او انى منفضله وكده هلبس فى غرامات و خلافه

او انى اخدت تمديد للمشروع و بكده لازم اغير ت النهايه الى التاريخ الجديد

لواستعملنا طريقه قيمه المشروع دى هنلاجظ ان المشروع المشروع ب لازم ياخد اكبر قدر من المصروفات العموميه حيث ان قيمه 20 مليون وده تقريبا اد باقى القيم ... يعنى ياخد نصف المصاريف تقريبا ..-- .. بس ده مش عدل لانه مشتغلش ولا تكلف ولا عملنا فيه حاجه اد المشروعين ج و د مثلا ف بالتالى ياخد نصيبه العادل يبقى طريقه قيمه المشروع مش عادله ..

لو استعلمنا تاريخ البدايه يعنى كل مشروع استمر معايا اد ايه برضو مش مراعيه لا حاجه خلاص ومش عاديه ومش معنى ان مشروع فضل معايا 3 سنين زى د انى احمله بنصيب كبير مع ان مصاريفه و ايراده تقريبا زى ب اللى فضل معايا كام شهر بس ..

فى عندى برضو طريقه اسمها نسب الانجاز يعنى انجزت اد ايه من كل مشروع .. بسدى مش تمام لان عندى مشروع ب 100 الف وانجزته كله السنادى هل احمله بمصاريف اكتر من المشروع ابو 20 مليون اللى انجزت منه 10 % مثلا( 2 مليون ) ؟؟ اصلا نسبه انجاز المشروع ابو 20 مليون دى2 مليون يعنى اكتر من اجمالى المشروع ابو 100 الف .. ولا ايه ؟؟

يبقى انا عندى ال 3 طرق اللى قلنا عليهم دول هم احسنهم ...

بالمستخلصات و الايراد

باجمالى الاجور المباشره ( زى نسب التحميل فى نظام التكاليف الصناعيه )

باجمالى التكلفه ( طريقه برضو فى التكاليف الصناعيه زى عدد الوحدات كده تقريبا )

لو لاحظنا ان ال3 طرق اللى فى الحل دول نسبهم قريبه من بعض اوى ولو عاوز تستعمل اى طريقه فيهم انت حر طبعا ...وبكده يبقى احنا علمنا الواجب وزياده ووزعنا المصروفات العموميه على المشاريع اخر السنه بسهوله اووووى ...

وعلى فكره هى دى الفكره

قائمه الدخل للمشاريع و القائمه المجمعه للشركه ككل بطريقه الاجور المباشره :-

بيــان المجمعه ( أ ) (ب ) ( ج ) (د )

ايراد المشاريع 7120000 0 1000000 5000000 1120000

م المشاريع 6565000 (100000) (1138000) 3940000 ) (1145000)

مجمل الربح/خساره 555000 (100000) (380000) 1060000 (25000)

م عموميه واهلاك (850000) (17000) 178500) (535500) (119000)

صافى الربح/خساره (295000) (117000) (558500) 524500 (144000)

+ ايرادات راسماليه 350000 خلى بالك ان عندى 3 مشاريع خساره وواحد بس اللى فيه ربح وبالتالى اجمالى الخساره للشركه ككل 295 الف بس لما ضفنا بنود اخرى للايراد غير متعلق بنشاط الشركه الرئيسى اظهر صافى ارباح للعام بقدر 455 الف .. وده نخلى بالنا منه اوى لما نيجى نعمل تحليل مالى للقوائم ....

+ ايراد ايجار عقارات 400000

صافى الارباح 455000

زى ما شفنا ربح او خساره كل مشروع لوحده و القائمه المجمعه قبل ما نوزع عليه المصروفات الاداريه وبعد ما وزعنا المصروفات الاداريه .. وهى دى الفكره ببساطه تااااااامه ..

لاحظ ان :

اجمالى الا يراد للشركه = ايراد المشاريع أ + ب + ج + د .

اجمالى م المششاريع للشركه = اجمالى م المشاريع أ + ب + ج + د .

بعد ما وزعنا م عموميه اصبح الربح/خساره الشركه = ارباح/خساره المشاريع أ + ب + ج + د .

بعد كده بنضيف بنود ايراد او مصروف غير متعلقه بالنشاط العام للشركه ك ايجار او سمسره او عمولات او راسماليه او غيره ... وده صافى الربح للشركه

خلى بالك بالرغم من ان الشركه خساره الا انها باين لها صافى ربح ..



reaction:

تعليقات

©